靖康之变前后个一些要点
1、为啥北宋介纠结“燕云十六州”
燕云十六州（其实更加应该包括营、平、滦三州），在地理高头是华北平原同蒙古高原个分界线，尤其是以幽州（北京）作为中心个山前诸州地区，一旦畀南面个大一统王朝掌握，就好有机会在拉居庸关一线展开防御，依靠高耸山峰，拒绝北方敌人南下。后晋拿此地交把契丹，连同更加同蒙古高原联系紧密个第二道防线——云中地区（也就是山后诸州）一道，为契丹人提供大量人口及资源，又让伊拉获得极好个地理优势，占据战略个主动性。
北宋初年，帝国高层为收复此地做过努力，但因为交关原因，全宣告失败，等到五代德性遗留丧失，收复也成为妄谈，在拉11世纪初达成战略平衡，本身也是双方选择个结果。弗过，对于燕云十六州个惨痛记忆同牵挂，从来弗曾在拉宋朝君臣想法当中消失，到好大喜功，欢喜对外秀肌肉展示自家国力个宋徽宗执政辰光，宋朝是弗会拒绝利用辽国内乱机会，做克复燕云个春梦个。
2、宋徽宗是“舞文弄墨‘，畀”当皇帝耽误“个文化人？
靖康之耻，虽然宋钦宗是直接责任人，但从一开始策划到让问题愈演愈烈，伊个阿爸宋徽宗当然要负更多个责任。
赵佶同李煜差弗多，对郑智本身是邪气有兴趣，也邪气关心个。伊当政辰光，宋朝搞出各种形象工程，四面出击，又装神弄鬼，搞七捻三个事体恐怕比伊自家神神叨叨个阿爸 赵顼 当政阶段还要更加多。
赵佶所谓个“文化成就”，交关是伊利用自家帝王身份，穷奢极侈个结果，各种对汴梁城池毫无目的个“美学工程”，为修造皇家园林艮岳搬运个花石纲，以及各种花头十足个敛财手段，本身全是对民间负担个家中，反映出伊拿个人兴趣放在国家安稳之上个倾向。同时，对外发动战争（弗单对金，还包括之前对西夏），也是老命伤财，转移老百姓对伊自家腐朽个豁胖举动，对西夏还可以自我白相，对辽落井下石，个么最后有此种结果，也是求仁得仁。
3、北宋军队战斗力哪能，为啥介弗经打？
北宋军队战斗力推板，是靖康之耻爆发个根本性原因。
本书对北宋军队在拉组织系统高头个战斗力弱点，以及腐朽指挥者带来个自毁长城着墨比较多，这些话题也属于老生常态，交关研究全有提到宋个军事系统政出多门，管理效率低下，大部分军队待遇推板，犯人同下三滥充斥部队，皇帝越权瞎指挥之类。此类问题从宋初年开始一直到靖康，基本上弗曾得到解决。靖康元年第一趟围困之后，有人建议在拉山西同河北设立一批唐朝类似个藩镇，弗过真正落地，要等到建炎年间之后哉。
但有句讲一句，即便是正面公平作战，宋军也绝对弗是金军个对手。12世纪早期个女真军队，本身战斗力惊人，并且相当擅长融汇其他族群个势力，为自家效命，在金灭辽过程当中，吸纳大量渤海人（自家亲眷），契丹人（老早对手），以及燕云汉儿（见风使舵，啥人强帮啥人），本身是森林猎人部落个完颜，得到渤海人帮忙之后，相当短个辰光之内就打造出强大个重骑兵部队，此种军队纪律严明，韧性极好，并且对宋军依赖个弓箭重弩并无多少契丹同党项人类似个惧怕，个能，让之前一百年当中基本只能同西夏练兵个北宋“精锐”西军也毫无办法破解。
此外，在拉心态高头，新兴个女真部落军队无军饷，一切靠劫掠获得战争回报，在拉战斗动力高头，就比宋军高出一个档次，当金熙宗之后开始全面汉化，女真个战斗力也就等而下之（弗过南宋主动作战辰光，还是打弗过伊拉。。）。
4、金国是撕毁和约南下个？
以往个历史书当中经常讲，是金国人看北宋战斗力推板，贪图更大个利益，就撕毁和约，断然侵略。
迭个讲法，判断上对，技术浪倒是值得怀疑。更加贴切个是，金国主观高一直想侵略，但客观浪，宋自家无能又白相小把戏，未能履约太多趟，让金有太多口实，是有一眼咎由自取个。
当初宋同女真”海上之盟”，就是宋自家抛弃辽之后，主动去寻女真人，提出要联合进攻辽国。阿骨打对此讲个相当清爽，是南朝皇帝自家来寻阿拉“帮忙”个，冇宋人，金人一样可以拿辽国灭脱。后势来个战争情景发展也证明女真人讲个冇啥错误，辽个五京全是女真人打下来个。宋金本来约定让宋打幽州，之后宋获得山前七个州，但宋自家打弗过辽国残余势力，只好让金人出面。个辰光盟约实际已经失效。之后宋就进入到低三下四许诺赎金-反悔撕毁约定-金人敲打之后认错许诺更多赔偿-继续后悔违反约定个循环当中，搞出几趟此类事体之后，人家也就看清宋硬实力一泡污，个性还娘娘腔个特点，到迭个阶段，弗畀绑票已经蛮难哉。
5、郭药师为啥投降金军？燕云汉人哪能站队？
郭药师个角色有一眼类似后世个吴三桂，伊虽然自家是辽东人，但基本盘在拉燕云，伊个军队“常胜军”，代表燕地汉儿个利益导向。
相比完全见风使舵个角色，作为个体个郭药师实际对宋还算忠诚，投诚之后，尽管畀南面派来个官僚延边，早期还是尽量帮助宋军作战。弗过，伊手下头个军队就冇对汴梁朝廷有多大感情哉，在拉金后势来第一趟南下个过程当中，燕云带路人员交交关关，郭药师发现自家假使弗投金，就要畀手下人杀脱，当作把女真人个见面礼，伊个选择也就显而易见哉。
6、金人对宋烧杀劫掠，让华北人民民不聊生？
打相打自然有杀人放火个必备桥段，但同之后几趟南征相比，金前两趟南侵实际浪还算“宅心仁厚”，无论是西路个粘罕还是东路个二太子，全弗允许军队滥杀无辜，对待宋个俘虏，也弗太残忍。
迭个现象个主要原因是金在拉靖康之变之前，主要个需求还是用傀儡统治“南朝”，第一趟南下，甚至更多是为勒索金钱钞票，对冇表现出太大抵抗意志个当地人，也就一般网开一面。
真正撕破面孔，要等到二帝畀捉，康王登基之后。
7、为啥宋钦宗乖乖去当俘虏，弗想逃跑？
宋钦宗上台辰光弗长，刚上来就碰上第一趟汴梁之围，之后几个月，伊热衷同自家阿爸进行内斗，又陷于自家眼界能力局限，完全冇想过对金国人南下做准备。李纲、种师道建议过伊去关中，后势来也冇成行。
8、汴梁是哪能畀攻破个？
汴梁陷落本身有偶然性，是道君皇帝到来个迷信活动个一个恶性结果，用神兵天降当秘密武器，同女真人学习金属锻造进阶军事，当真是天差地别哉。弗过，第二趟汴梁之围辰光，勤王军队基本冇到，对金国围攻越来越吃紧，陷落也只是辰光问题。
9、李纲发挥了啥作用？
基本是打鸡血个作用，要是朝中个类似寇准个人物，也弗需要伊出场，弗过此类大臣，自然不会容于徽宗父子个朝堂，个么李纲也就显示出某种精神力量来哉，伊个作用仅此而已，能力是相当有限个。
10、康王为啥能够跑脱？
本身第二趟汴梁之围前，伊是要作为“谈判代表”北上去寻金军个，弗过在拉相州畀劝阻，看情况弗对头，就跑个比啥人都快哉。后来汴梁围困同陷落之后，伊也就成为漏网之鱼，自然就只有硬点哉。
11、金军是为占领北宋北方领土来个伐？撤出汴梁之后，北方形式哪能
靖康之后，金国是准备类似当年契丹捕获石重贵一样，搞一场改朝换代个，领土要求虽然每趟全越变越大，但顶多也就要黄河以北。
在拉拿赵佶，赵桓捉牢北上之后，伊拉基本默认黄河为界，而且河北交关地方也弗曾占领。金国人本身以为张邦昌会当自家硬点个大楚皇帝，么相当张邦昌是铁血强宋忠臣，还朝把赵家（废后孟氏，之后是赵构），个么，之后几年伊拉就连续南下，每一趟进攻全更猛烈，一直拿赵构赶到江南，浮舟海上。
12、畀捉到北方的主要是哪些人，结局哪能？
主要是赵宋皇室个嫡系以及近亲，包括宋神宗之后个各支，以及宋徽宗个交关儿子，妃子，女儿，还有畀金人点名道姓，当作“触发战争”罪魁祸首个官员家眷，河北按照条约应该交把金国地区，还弗肯投向官员个家眷，以及交交关关技术匠人、僧侣、乐工之类。大概有1万多人。
个当中，交关人在到幽州之前就已经路浪死脱，到上京个更幸存邪气少。赵宋个王室除脱路上死脱之外，倒是弗曾畀可以迫害死脱太多。金国人对伊拉个态度，同东北亚部落击败敌对部落之后，对待失败一方上层个做法差弗多，是强迫伊拉进行融合同化，纳入自家统治集团。赵送个皇家子孙蛮多同金或者老早契丹个贵族联姻结婚，宋徽宗也成为蛮多金国大将个岳父。
13、靖康之耻对宋同金文化层面有啥影响？
对宋来讲，因为靖康之耻当中大臣、老百姓表现出来个麻木，还有女性畀俘虏之后改嫁让人无办法接受，让道学在拉南宋阶段兴旺起来，同理还有明显上扬个华夷之变，北宋阶段比较自由个风气，到南宋慢慢畀后世常见个道学家替代，朱熹个出现，弗是偶然情况。
对金来讲，靖康之后打开伊拉占领中原个潘多拉魔盒，畀女真人捉到北方个各种皇室成员同匠人，极大让金国向一个“汉化王朝”转变。迭个刺激速度实在太快，比之前个契丹、之后个蒙元同甚至满清全要迅速、严重交关，让金国个武力迅速下降，但规章礼仪迅速繁琐周张，到1170年代，南宋使节看到个金国，已经同南朝当年在拉洛阳看到个末期北魏一样，纤巧又华丽，但本身个存在，也就快行将九米了。
