海上花列传

子富自過對過房間裏，祇見黃翠鳳獨自一個坐在桌子傍邊高椅上，面前放著那一對金釧臂。翠鳳見子富近前，笑說：「來㖏。」揣住子富的手捺到榻床坐下，說道：「倪無娒上耐當水，聽仔耐閑話，快活得來！我就曉得耐是不過說說罷哉。耐有蔣月琴來哚，陸裏肯來照應倪？倪無娒還拿仔釧臂來撥我看。我說：『釧臂末啥稀奇，蔣月琴哚勿曉得送仔幾花哉！就是倪也有兩副來裏，才放來哚用勿著，要得來做啥？』耐原拿仔轉去罷。隔兩日，耐真個蔣月琴搭勿去仔，想著要來照應倪，再送撥我正好。」 子富聽了，如一瓢冷水兜頭澆下，隨即分辨道：「我說過蔣月琴搭定規勿去哉。耐勿相信末，我明朝就教朋友去搭我開消局帳，阿好？」翠鳳道：「耐開消仔，原好去個啘。耐搭蔣月琴是老相好，做仔四五年哉，俚哚也蠻要好。耐故歇末說勿去哉，耐要去起來，我阿好勿許耐去？」子富道：「說仔勿去，阿好再去嗄？說閑話勿是放屁。」翠鳳道：「隨便耐去說啥，我勿相信晚耐自家去想㖏，耐末就說是勿去，俚哚阿要到耐公館裏來請耐嗄？俚要問耐，阿有啥得罪仔耐了動氣，耐搭俚說啥？阿好意思說倪教耐覅去嗄？」子富道：「俚請我，我勿去，俚阿有啥法子？」翠鳳道：「耐倒說得寫意哚。耐勿去，俚哚就罷哉。俚定歸要拉耐去，耐阿有啥法子？」 子富自己籌度一回，乃問道：「價末耐說要我那價㖏？」翠鳳道：「我說，耐要好末，要耐到倪搭來住兩個月，耐勿許一干仔出門口。耐要到陸裏，我搭耐一淘去。蔣月琴哚也勿好到倪搭來請耐。耐說阿好？」子富道：「我有幾花公事哚，陸裏能夠勿出門口？」翠鳳道：「勿然末，耐去拿個憑據來撥我。我拿仔耐憑據，也勿怕耐到蔣月琴搭去哉。」子富道：「故阿好寫啥憑據嗄？」翠鳳道：「寫來哚憑據，阿有啥用場！耐要拿幾樣要緊物事來放來裏，故末好算憑據。」子富道：「要緊物事，不過是洋錢啘。」翠鳳冷笑道：「耐看出倪來啥邱得來！阿是倪要想頭耐洋錢嗄？耐末拿洋錢算好物事，倪倒無啥要緊。」子富道：「價末啥物事㖏？」翠鳳道：「耐覅猜仔倪要耐啥物事。倪也為耐算計，不過拿耐物事來放來裏，倘忙耐要到蔣月琴搭去末，想著有物事來哚我手裏，耐也勿敢去哉，也好死仔耐一條心。耐想阿是？」 子富忽然想起，道：「有來裏哉，坎坎拿得來個拜匣，倒是要緊物事。」翠鳳道：「就是拜匣蠻好，耐放來裏仔阿放心？我先搭耐說一聲，耐到蔣月琴搭去仔一埭，我要拿出耐拜匣裏物事來，一把火燒光個㖏。」子富吐舌搖頭道：「阿唷，利害哚！」翠鳳笑道：「耐說我利害，耐也識差仔人哉！我做末做仔個倌人，要拿洋錢來買我倒買勿動㖏。覅說啥耐一對釧臂哉，就擺好仔十對釧臂，也勿來裏我眼睛裏。耐個釧臂，耐原拿得去。耐要送撥我，隨便陸裏一日送末哉。今夜頭倒覅撥來耐看輕仔，好像是倪看中仔耐釧臂。」一面說，一面向桌上取那一對金釧臂，親自替子富套在手上。子富不好再強，祇得依他，道：「價末原放來哚拜匣裏，隔兩日再送撥耐也無啥。不過拜匣裏有幾張棧單莊票，有辰光要用著末，那價？」翠鳳道：「耐用著末，拿得去末哉。就勿是棧單莊票，倘忙有用著個辰光，耐也好來拿個啘。到底原是耐個物事，阿伯倪喫沒仔了？」子富復沉吟一回，道：「我要問耐，耐為啥釧臂是覅㖏？」翠鳳笑道：「耐陸裏猜得著我意思。耐要曉得做仔我，耐覅看重來哚洋錢浪。我要用著洋錢個辰光，就要仔耐一千八百，也算勿得啥多；我用勿著，就一厘一毫也勿來搭耐要。耐要送物事，送仔我釧臂，我不過見個情；耐就去拿仔一塊磚頭來送撥我，我倒也見耐個情。耐摸著仔我脾氣末好哉。」 子富聽到這裏，不禁大驚失色，站起身來道：「耐個人倒稀奇哚！」遂向翠鳳深深作揖下去，道：「我今朝真真佩服仔耐哉。」翠鳳忙低聲喝住，笑道：「耐阿怕難為情嗄？撥俚哚來看見仔，算啥？」說著，仍揣住子富的手，說：「倪對過去罷。」挈至房門口，即推子富先行，翠鳳隨後，同向臺面上來。

蓮生回身，想要迎出去。祇見沈小紅早上樓來，直瞪著兩隻眼睛，滿頭都是油汗，喘吁吁的上氣不接下氣，帶著娘姨阿珠、大姐阿金大，徑往前軒撲來。劈面撞見王蓮生，也不說甚麼，祇伸一個指頭照准蓮生太陽裏狠狠戳了一下。蓮生喫這一戳，側身閃過一傍。小紅得空，邁步上前，一手抓住張蕙貞胸脯，一手輪起拳頭便打。蕙貞不曾提防，避又避不開，擋又擋不住，也就抓住小紅，一面還手，一面喊道：「耐哚是啥人嗄！阿有啥勿問情由就打起人來哉嗄！」小紅一聲兒不言語，祇是悶打，兩個扭結做一處。黃翠鳳、金鳳見來勢潑悍，退入軒後房裏去，趙家娒也不好來勸。羅子富但在傍喝教沈小紅：「放手，有閑話末好說個啘！」小紅得手，如何肯放？從正中桌上直打到西邊闌干盡頭，阿珠、阿金大還在暗裏助小紅打冷拳。 樓下喫茶的聽見樓上打架，都跑上來看。蓮生看不過，祇得過去勾了小紅臂膊要往後扳，卻扳不動，即又橫身插在中間，猛可裏把小紅一推，纔推開了。小紅喫這一推，倒退了幾步，靠住背後板壁，沒有喫跌。蕙貞脫身站在當地，手指著小紅，且哭且罵。小紅要奔上去，被蓮生叉住小紅兩肋，抵緊在板壁上，沒口子分說道：「耐要說啥閑話搭我說好哉，勿關俚啥事，耐去打俚做啥？」小紅總沒聽見，把蓮生口咬指掐。蓮生忍著痛苦苦央告。不料，刺斜裏阿珠搶出來，兩手格開蓮生，嚷道：「耐來幫啥人嗄，阿要面孔！」阿金大把蓮生攔腰抱住，也嚷道：「耐倒幫仔別人來打倪先生哉，連搭倪先生也勿認得哉！」兩個故意和蓮生廝纏住了。小紅乘勢掙出身子，呼的一陣風趕上蕙貞，又打將起來。蓮生被他兩個軟禁了，無可排解。 蕙貞本不是小紅對手，更兼小紅拚著命，是結結實實下死手打的，早打得蕙貞桃花水泛，群玉山頹，素面朝天，金蓮墮地。蕙貞還是不絕口的哭罵。看的人蜂擁而至，擠滿了一帶前軒，卻不動手。蓮生見不是事，狠命一灑，撇了阿珠、阿金大兩個，分開看的人，要去樓下喊人來搭救。適遇明園管帳的站在帳房門口探望，蓮生是認得的，急說道：「快點叫兩個堂倌來拉開仔㖏，要打出人命來哉呀！」說了，又擠出前軒來。 祇見小紅竟撳倒蕙貞，仰叉在地，又騰身騎上腰胯，祇顧夾七夾八瞎打。阿珠、阿金大一邊一個按住蕙貞兩手，動彈不得。蕙貞兩腳亂蹬，祇喊救命。看的人也齊聲發喊，說：「打勿得哉！」 蓮生一時火起，先把阿金大兜心一腳踢開去。阿金大就在地下打滾喊叫。阿珠忙站起來奔蓮生，嚷道：「耐倒好意思打起倪來哉，耐阿算得是人嗄！」一頭撞到蓮生懷裏，連說：「耐打㖏！耐打㖏！」蓮生立不定腳，往後一仰，倒栽蔥跌下去，正跌在阿金大的身上。阿珠連身撞去，收紮不來，也往前一撲，正伏在蓮生的身上。五個人滿地亂打，索性打成一團糟，倒引得看的人拍手大笑起來。 幸而三四個堂倌帶領外國巡捕上樓，喝一聲：「不許打！」阿珠、阿金大見了，已自一骨碌爬起。蓮生挽了堂倌的手起來。堂倌把小紅拉過一邊，然後攙扶著蕙貞坐在樓板上。小紅被堂倌攔截，不好施展，方才大放悲聲，號陶痛哭，兩隻腳跺得樓板似擂鼓一般。阿珠、阿金大都跟著海罵。蓮生氣得怔怔的，半晌說不出話。還是趙家娒去尋過那一隻鞋給蕙貞穿上，與堂倌左提右挈，抬身立定，慢慢的送至軒後房裏去歇歇。 巡捕揚起手中短棒，嚇散了看的人，復指指樓梯，叫小紅下去。小紅不敢倔強，同阿珠、阿金大一路哭著、罵著，上車自回。

漱芳又嗽了幾聲，慢慢的說道：「昨日夜頭，天末也討氣得來，落勿停個雨。浣芳㖏，出局去哉。阿招末，搭無裝煙。單剩仔大阿金，坐來浪打磕銃。我教俚收抬好仔去困罷。大阿金去仔，我一干仔就榻床浪坐歇，落得個雨來加二大哉！一陣一陣風吹來哚玻璃窗浪，乒乒乓乓，像有人來哚，連窗簾纔卷起來，直卷到面孔浪。故一嚇末，嚇得我來要死，難末祇好去困。到仔床浪㖏，陸裏困得著嗄？間壁人家剛剛來哚擺酒、豁拳、唱曲子，鬧得來頭腦子也痛哉。等俚哚散仔臺面末，臺子浪一隻自鳴鐘，跌篤跌篤。我覅去聽俚，俚定歸鑽來裏耳朵管裏。再起來聽聽雨末，落得價高興。望望天末，永遠勿肯亮個哉。一徑到兩點半鐘，眼睛算閉一閉。坎坎閉仔眼睛，倒說道耐來哉呀，一肩轎子抬到仔客堂裏。看見耐轎子裏出來，倒理也勿理我，一徑望外頭跑，我連忙喊末，自家倒喊醒哉。醒轉來聽聽，客堂裏真個有轎子釘鞋腳地板浪聲音，有好幾個人來浪。我連忙爬起來，衣裳也勿著，開出門去，問俚哚：『二少爺啥？』相幫哚說：『陸裏有啥二少爺嗄』我說：『價末轎子陸裏來個嗄？』俚哄說：『是浣芳出局轉來個轎子。』倒撥俚哚好笑，說我困昏哉。我再要困歇，也無撥我困哉，一徑到天亮，咳嗽勿曾停歇。」 玉甫攢眉道：「耐啥實概嗄。耐自家也保重點個㖏。昨日夜頭風末來得價大。半夜三更勿著衣裳起來，再要開出門去，阿冷嗄？耐自家勿曉得保重，我就日日來裏看牢仔耐，也無麼用啘。」