壬辰战争个前前后后
这本书属于介绍性质,交关地方引用还带有典型的夸张和”非专业性“色彩,现在根据作者个主要观点,对1592-1598年战争个前因后果做一个简要纪录,偶尔夹杂一眼自家个看法。
1、丰臣秀吉为啥要发动对外战争
动机邪气复杂,
一方面是日本战国阶段封建扩张形成规律导致个内部问题,从镰仓时代开始,日本武士集团个统治者就老难彻底解决愈发膨胀个武力地方贵族人口同有限个岛国分封地之间个主要矛盾,镰仓幕府在拉蒙古来袭之后因为迭个问题走向混乱,室町幕府因为南北朝战争结束之后无办法满足分封问题走向混乱,作为一个依靠收买、做交易笼络有力大名个农民儿子,木下藤吉郎无办法解决迭个问题,只有拿原先个攻击-降伏-重新分配领地个逻辑继续白相下去,才好让内部保持一种奋斗目标,弗会陷入内耗。
另外一方面,从织田家尸体高头寄生冒出来个”关白”政权,表面高头实现公家-武家合体,让日本从战国时代走向太平。但作为证券核心个秀吉本人,实际上是顶顶脆弱个:伊一来无任何显赫背景,导致家臣团规模比较小,而且无啥真正忠心个家臣;二来自家屋里人丁也弗兴旺,仰仗个直系亲属一个也无,只有同母异父个阿弟、阿妹之类个当作自家个铁杆。后势来收养交关养子,可能也是为弥补个问题带来个人手不足;三来伊自家生育能力可能有老大个毛病,一直冇啥男性继承人,导致内部为迭个事体鸡飞狗跳,从后来壬辰战争个经过来看,秀吉明显对自家个继承人问题关注度更加高,要高过对朝鲜个战争关注哉。
2、出兵朝鲜个目的是啥?
根据书当中个讲法,第一趟(1592年)出兵朝鲜个目的是为“假道征明”,从1589到1592年初,搞弗好迭个动机大部分是真心个行为,表现在拉猴子对于征服明国行为个邪气重视,专门修造名护屋城,并且在拉对待朝鲜外交大臣辰光沉浸式个认为人家是来臣服自家个。迭个心态一直到1592年秋天还在拉持续,当时伊把自家外甥,“杀生关白”秀次个文章当中,就绘声绘色描写过自家要移居宁波,让天皇移居北京之类,主要可能同当时日本军队个战争顺风顺水有直接关系。
弗过,在拉明朝干预,战争进入相持之后,伊个胃口就慢慢变个更加理性,从”碰运道征服明帝国”,回归到让日本挑战明帝国在拉东亚体系当中地位个方向。后势来个谈判之所以能够得到进展,伊个睁只眼闭只眼起到蛮大作用。一直到1597年伊认为万历个“赐尔日本国王”太过侮辱,本身要求个和亲,平等化待遇全弗曾拿牢,才重新报复性开战。个辰光,伊个目的就弗是征服或者讨价还价哉,完全是掠夺同震慑性毁灭,用意是在拉告诉朝鲜人同明朝,日本人是有能力来去自如个,谈判是把倷一眼面子而已。
3、出兵朝鲜个主要是哪些大名,伊拉是哪能组织个
主要是西国大名,根据距离朝鲜距离以及同猴子自家个亲疏程度,分担出兵义务。所以,在拉第一趟征讨朝鲜个九个军团当中,大部分来自九州岛、四国岛以及本州岛西部,个当中还好分两类:一类是猴子一手培育出来个加藤清正、福岛正则之类,以及总是挂名总大将个“富二代集团”(宇喜多秀家,小早川秀秋),此外还包括石田三成之类负责后勤同监军个管理者;另外一方面是有实力个西国本土势力,比方讲小早川隆景、鬼石曼子, 锅岛直茂 之类。
水军方面因为日本水军水平比较推板,来源更加复杂一眼,包括濑户内海个海贼大名以及蛮多九州经营外贸个大名,比较特殊个人物是对马岛主宗家个势力,伊拉同朝鲜关系比较复杂,充当过双边接洽蛮多职务,后势来也派出超出自家本身领土规模个军队参战。
日本军队虽然设置有高层指挥部,弗过在拉具体个派遣高头还是中古封建作风,基本各军团在拉早期各行其是,自家管自家攻击、占领各自未来个“封地”。个当中,一马当先个小西行长第一军团同加藤清正个第二军团出力顶大,同朝鲜-明个冲突也顶多。在拉碧蹄馆之后,日军个军团划分之间有所减弱,弗过还是根据各大名自家个私人军队分开编制作战。
4、朝鲜人有意识到日本有要入侵伐,防御水平哪能?
16世纪个朝鲜长期陷入到儒棍欢喜个“党争”当中,个辰光正好是东人党同西人党争斗顶闹忙个阶段,无论是猴子递交国书要求朝鲜臣服,还是后势来朝鲜人自家去京都面见秀吉之后回来禀报个情况,在拉东西两边看法全完全弗一样。作为“内圣外王”国家个代表,朝鲜两班在拉境内个影响力比明朝士大夫大交关,伊拉个内斗让君主或者有识之士完全无办法贯彻有用个防御措施,在拉日本人来袭之前,朝鲜个防御准备聊胜于无,基本全是空摆设。
当然,即便朝鲜防御准备个老好,也弗会在拉正面战场有啥卵用。16世纪后半夜个朝鲜军事能力可能是欧亚大陆倒数,全国大部分军权学习宋明,由文人掌控,武将地位推板,而且真正有战斗能力个军队只有北面防备女真人个边防部队,到海边邪气远,更无可能让文官同意调动。朝鲜还学习宋朝,搞兵将分离,兵弗晓得自家将帅,将帅弗晓得自家个军队,战斗力更加是一塌糊涂,完全是治安维持水平。
5、日军登陆之后为啥进展介快?
首先是战斗力存在代差,虽然日军缺乏重型火器,但铁炮技术高头已经同世界先进水平弗存在代差,同时,战国辰光锻炼出来个百战军队,对承平日久个朝鲜治安兵完全一边倒碾压。
其次,心态高头差异太大,战争爆发之前,日本已经为战争做充足准备,进军路线同占领之后个安排完全布置到位(虽然后来才发现有眼纸上谈兵),朝鲜根本无进行啥战争动员,甚至交关武将本身爷 怀疑日本人“有冇有胆量”攻打伊拉迭个小中华。
此外,顶关键个一点是,日军在拉登陆之后因为内部竞争,全选择执行“斩首行动”,控制釜山之后,并弗曾攻击旁边个全罗道地区,反而选择走鸟岭山路,直插汉城,个能让朝鲜军队个低效调动同低下战斗能力双重暴露,用弗要一个月就让宣祖狼狈逃跑。
6、朝鲜义军起到多大作用?义军构成是哪能个。
作者引用相当多朝鲜人自家个材料,证明“义军”对日军构成严重威胁。迭个方面体现出伊对朝鲜个同情,并且弥补脱之前明粉有意忽视个朝鲜本土抗日情况。有一定价值
朝鲜义军主要是地方个土豪,两班贵族在拉本乡组织个武装势力,当中既有伊拉自家个一家门成员,乡里乡亲,也有招揽过来,畀日本人搞个国破家亡个流民死士。这群人一般规模浩大,但战斗力全十分有限。另外,之前一百多年当中畀儒棍打压个朝鲜佛教也出动交关僧兵对日本人作战。伊拉个战斗力要好一眼。
从朝鲜个国家动员力好看出,伊拉个社会大概出于一种晚唐辰光个样式,本地私人武装同宗教武装虽然畀王京打压越来越严重,越来越边缘化,但好歹还是可以一用,可以对日军造成一定个伤害,弗过作者还是夸大蛮多义军个作用,实际浪,就同宋人抗金,明人抗清一样,中枢躲在鸭绿江边浪,时刻准备“内附明朝”个迭个李家朝廷只要真跑脱,个么丧失情感支撑个朝鲜人抵抗崩溃,也是大概率个事体。
7、李舜臣战斗力有介老卵伐?起到多大作用?
要承认,在拉朝鲜大部分正规军低级水平个映衬之下,李舜臣连同朝鲜水军战斗力就显得蛮高哉。至少伊拉在拉对日本水上力量个辰光要吃相好看交关,获得个战功也多交关。弗过,要说明个一点是,此类胜利个关键性因素弗是李舜臣自家在拉当时个世界高头有多老卵(同龟船一样,是吹出来个产物),而是日本水师当真是太推板,基本还处于公元前地中海接舷战个认知水平,才把伊介多使用“重船重炮”发挥个机会。
此外,朝鲜人一直强调日军个补给线因为李舜臣个原因无办法通过海路完成,但事实上伊起到个作用相当有限,日军弗去搭理伊完全可以维持后勤运输,李后来蛮多战果,全是主动出击,而弗是守株待兔获得个。
8、明朝对丰臣秀吉侵略到底是啥态度?
明朝对日本个态度同伊拉对外界个总体态度一样:弗想了解,更无兴趣关注。
所以,日本个交关动态明全是通过二手途径晓得个,甚至在拉一开始日本侵略朝鲜之前,日朝个接触明朝完全就弗曾有了解。
明朝后势来个出兵,关键问题是认识到日本人弗是单单嘴炮征服自家,而是切实攻占到朝鲜个所有大城市,兵临鸭绿江,为拿战场放在国境线之外,所以才被动出击。个能,明朝在拉思考同日本个关系辰光,就完全按照自家个思路,为自家个利益服务,一方面,造成伊拉对日本个态度茫然无知,闹出册封笑话,另外一方面,也让伊拉对朝鲜本身个利益无任何兴趣保护,明军过境地方,一样鸡飞狗跳,民弗聊生。1593年,发现无办法速战速决个明同意同日本“谈判”,出发点也是尽量大事化了,让日本遵守自家个秩序规则,充当朝贡体系一部分。至于朝鲜到底哪能,只要价钱谈拢,全好商量。
一直到1597年,猴子拒绝册封,又一趟出兵朝鲜,才让明断绝“抚夷”个念想,下定决心,增兵进行大规模作战。
9、明军在拉同日军交战当中表现哪能
比朝鲜军队好蛮多,弗过远弗曾到立竿见影个水平。
无论是平壤之战、碧蹄馆还是后来蔚山之战,明军实际上战场高头全是失败者,之所以能够维持对日军个压力,一方面是体量太大,另外一方面,在拉调度,使用炮灰等方面,拥有更加多个优势。
明军在拉重武器高头优势明显,骑兵也具有对矮种日本马个碾压,此类优势在拉战争当中本身可以作为对日军筑城同轻武器(铁炮)优势个对冲,再利用国力长期消耗,压垮对手。但明军在战略高头个昏庸,让战争陷入到长辰光相持当中,无论是祖承训、李如松还是 杨镐,面对日军全无多少认真研究,心态高头爆棚,自以为是天兵天将,结果一碰到一眼挫折,就原形毕露,弗肯再化力气死战。在拉战场层面,实在无啥拿得出手个成绩(明粉当然可以各种粉饰,吹捧,一如伊拉几百年后个南京后辈)。
讲到底,这种全国动员调动部队,去应对局部战争还相当吃力个行为,本身就是国力下降,管理混乱,战斗力低下个直观体现,明在拉1590年代面对封建且渡海而来个日本,还好在朝鲜利用仆从国炮灰维持下局面,廿年之后,深入到黑山老妖领地深处个军队就无介好结局哉,萨尔浒之战个预期,实际在拉朝鲜就好看到端倪勒。
10、明日和谈是啥情况?结果哪能。
基本是双方一线当事人厌倦消耗对峙,想早一眼结束战争个理性行为,无论是一开始一路高歌猛进个小西行长还是弗拿日本人当正经对手个李如松,本身都是利用自家私人势力夺取资源个军阀类型人物,高层让伊拉代表自家相互打相打,对伊拉自家长期全是无好处个。和谈个愿望远比蹲在紫禁城同伏见城个最高决策者高交关。
个也就是为啥嘉兴沈先生这类本身弗属于东北亚严苛体系个东亚海洋类商人在拉1593-1596年当中阶段好大放异彩个原因,当然,伊个接洽对象小西行长本身也是九州出身个东亚类商人,在对待朝贡个认知高头,要比决策者灵活交关。
但是,在拉儒棍个同心圆天下世界观当中,任何让日本平起平坐的企图都只会最终落空,弗单单明弗可能接受,就是自比小中华,拿自家当作儒棍优等生个朝鲜,也弗可能让日本达到高于自家个地位。
11、同一辰光其他势力做了点啥?
小国琉球也收到过猴子个“劝降信”,因为地方小,伊拉立马表示服从并派人“朝贡日本”,弗过又拿情况通报到明朝。后势来猴子要求琉球派兵助战,琉球以国小路远为由推脱,猴子对此表示理解。
同菲律宾个关系复杂一眼,猴子本身也派人到马尼拉,要求板鸭”效忠“,在拉语气尽量软化之后,马尼拉总督拿迭个做法当成是日本寻求同日不落帝国结盟,对此表示”费利佩二世不拒绝真正的友谊“,之后派人到日本回信,但双方因为沟通问题,冇啥具体协议。
1596年左右,有一艘马尼拉大帆船漂流到日本,畀猴子扣押并且没收所有财物,西班牙为此同猴子接洽,但沟通上出现一眼问题,让猴子认为西班牙有意侵略日本,为此对境内天主教徒进行又一轮迫害。弗过,在拉迭个时间节点,伊也弗可能有啥心思去进攻比琉球还要远个马尼拉哉。
最后,加藤清正在拉北上进入咸镜道个辰光,曾经短暂跨过图们江,进入女真地界,日本后来个资料对迭个战役语焉不详,恐怕是受到过挫折。
12、壬辰战争个影响:
同一般个想法弗一样,壬辰战争对明以及对日本本土个影响事实上全比较有限,明虽然在战争当中暴露出交关严重问题,但战争本身个耗费同人员折损,并弗是后来萨尔浒战争惨败个直接导火索。本身个场战争也同播州、宁夏一样,畀当成一场”边境动乱“,更多程度上,是一场维持传统儒棍天下体系个战争,并且最终达到自家个目的哉。
对日本来讲,国家损失恐怕更加小,但对日本内部个权力斗争影响邪气大,丰臣内部文治武斗两派个冲突就是在拉朝鲜激化个,加藤清正同小西、石田个冲突,演变到弗可调和,而弗曾出兵个老乌龟坐收渔翁之利,在拉猴子死脱之后,迅速利用此类冲突,挑拨丰臣内部,最终夺得日本控制权。
对朝鲜来讲,战争对国内个损失顶顶结棍,弗单经济崩溃,大量手工业畀日本人掠走,还因为战争辰光碟册烧毁,导致新个,冒名顶替个两班资格人数量增多。战后朝鲜在拉军事高头也进行一眼改革,学习日本个铁炮技术,但更加严重个还是因为两班导致个党争严重化。此类问题让本身就元气大伤个朝鲜进一步走向内卷,最终在拉三十年胡乱之后,沉浸到小中华个彻底迷梦当中,一做就是两百多年。
花了一个礼拜,总算把这本书读完,属于传统历史故事类型,并且具有比较鲜明的站队和喜爱褒贬。考虑到作者出版的年代和身份,这么做并不令人奇怪。因为在拉朝鲜成长个原因,在引用材料以及站队上,不可避免是显著倾向于朝鲜,这点不仅无可厚非,也有助于了解目前韩国内部对这场战争的主流评价。至于“是否符合史实”,“真实历史不是这个样子”,大概不是本书的第一目的,出版方作为一直出版通俗文学性历史读物的系列,也没有100%的义务和职责,出版供各种“历史专业学者”喜闻乐见,并且可以直接当作学术引用的学术类书籍。这一点上,对本书的那些指责不仅是毫无必要,而且只能体现出一种掉书袋的可笑的。(大概是相互用“历史资料”相互攻击对方“不公正”“不客观”的冷炮同冷兵器研究个相爱相杀的同为面)